На денешен ден, 1931-ва година, почнала серијата разорни земјотреси која кулминирала со земјотресот од 8-ми март, кој бил со магнитуда од 6.7 степени според Рихтеровата скала.
Во земјотресот загинале 31 лице, а повредени биле 82. Најмногу жртви имало во Пирава и тоа 19.
Земјотресот ја спуштил Валандовската котлина за повеќе од 40 сантиметри, а најголемата пукнатина во земјата била долга речиси 1 километар, а широка 2 метра.
Од земјотресите биле оштетени околу 45 населени места, од кои 29 во најтесното епицентрално подрачје, претежно регионот на Валандово и 16 во неговата непосредна околина.
Забележано било и преполнување на базените во Негорските бањи, но и покачување на температурата на водата за 4 степени, која се вратила на својата нормална температура дури после 10-12 дена.