На шестата седница на Советот на Општина Валандово, која е закажана за во понеделник, ќе се расправа за распределба на народните пари, на лица и субјекти од општината кои поднеле барање за финансирање.
Меѓу оние кои очекуваат финансиска помош од Општината се и фудбалските клубови „Победа“ од Валандово, „Младост“ од Удово, „Партизан БАШ“ од Башибос и Ученичкиот спортски клуб од Валандово.
Од Општинските пари зависи и реализацијата на „Ловечката вечер“ која традиционално ја организира Ловното друштво „Орел“ од Валандово.
На Дневниот ред на Седницата е и предлог-одлуката за доделување средства за лекување на лице од општина Босилово, како и за авторот Трајко Аврамов за печатење на книгата „Гевгелиско – Валандовски говор во говорното подрачје Гевгелија и Валандово“.
На „зелено светло“ чека и распределбата на државните пари наменети за основните училишта на територијата на општина Валандово, како и општинското учество во проектот за изградба на повеќенаменско игралиште во Калково.
Можеби и најзанимлива од сите точки на Дневниот ред е предлог-одлуката за набавка на медоносни растенија, за потребите на пчеларите од општината. Со позитивен исход од гласањето по оваа точка, би се потврдилe заложбите на Градоначалникот и на локалната власт да го зачуваат приматот на општина Валандово како една од најземјоделските општини во Македонија.