Патувачката изложба „Ана Франк – Историја за денес“, во организација на Младинскиот образовен форум, церемонијално во Домот на културата „25-ти Мај“ во Валандово ќе биде отворена во вторник со почеток од 18.00 часот. Изложбата ќе остане отворена за посетители до 10 април 2018 година, додека влезот е бесплатен.
Отварањето ќе биде проследено со говори од Градоначалникот на Општина Валандово – Перо Костадинов и други гости.
Изложбата претставува збир од триесет и девет изложбени панели, преведени на македонски и албански јазик, кои носат бројни детали од животот на малата Ана и нејзиното семејство од Втората светска војна.
Изложбата е отворена во Македонија во рамки на проектот „Хисторија, Историја, Повјест – Лекции за сегашноста“, а организатори се Младински образовен форум и Куќата на Ана Франк од Амстердам. Во изложбата има и панели кои се креирани посебно за македонскиот контекст во периодот по Втората светска војна до денес, а изработени од домашните експерти Мишо Докмановиќ и Бесник Емини.