Левица од Богданци на својот Фејсбук профил објави пост во кој се тврди дека пратеничката од редовите на СДСМ од Богданци, Драгица Ѓавочанова, која традиционално во Парламентот ги застапува и интересите на трите општини Валандово, Богданци и Дојран, е во Топ5 листата на пратеници кои наплатиле најголеми суми за патен трошок.
Ѓавочанова според Левица потрошила нешто повеќе од 3000 евра за 5 месеци, што според партијата е многу имајќи в предвид дека Парламентот не работи.
„Прашање е дали пратеничката патуваше со авионски, или бродски превоз, ако не, бараме јавно да ни обзнани каде и како потроши 185.607,00 денари за одење на работа покрај својата пратеничка плата!“ се вели во објавата на Левица.
Пратеничката на својот Фејсбук профил одговори на прозивката и им порача на членовите на Левица да го прочитаат Законот за пратениците.
„Ви има ли кажано вашиот лидер дека седниците некогаш завршуваат и на полноќ, а богами и подоцна? Како би знаел, кога не е таму! Ви има ли кажано вашиот лидер дека заради неговите „интересни“ амандамани Собранието не може да работи онлајн во време на пандемија? Во иднина, пред да си играте „весела“ математика и да претпоставувате кој колку ќарил досега, да ве упатам (зошто очигледно е дека лидерот не ви објаснил) да го прочитате член 31 став 1 алинеја 7 и став 2 од Законот за пратениците.“ напиша Ѓавочанова во одговорот на прозивките.
Во коментарите под нејзиното излагање пратеничката додава и дека доколку од партијата Левица продолжат со клевети и навреди ќе поднесе тужба за што веќе собира материјал.